ប្រែសម្រួល៖ រតនា
រុស្ស៊ីនិងអ៊ុយក្រែនត្រូវតែសម្រេចបានកិច្ចព្រមព្រៀងបញ្ឈប់បាញ់ដើម្បីឱ្យសហរដ្ឋអាមេរិកអាច “បន្តទៅមុខ” ក្នុងការចរចាបញ្ចប់សង្គ្រាមពេញលេញ នេះបើតាមអ្នកនាំពាក្យក្រសួងការបរទេសសហរដ្ឋអាមេរិកលោកស្រី ធេមមី ប្រ៊ូស បាននិយាយនៅថ្ងៃទី១០ ខែឧសភា។
សេចក្តីថ្លែងការណ៍របស់លោកស្រី ប្រ៊ូស កើតឡើងខណៈពេលដែលអ៊ុយក្រែននិងសម្ព័ន្ធមិត្តអឺរ៉ុបទាមទារឱ្យមូស្គូទទួលយកសំណើរបស់ពួកគេសម្រាប់ការបញ្ឈប់បាញ់រយៈពេល៣០ថ្ងៃដោយគ្មានលក្ខខណ្ឌចាប់ផ្តើមនៅថ្ងៃទី១២ ខែឧសភា។
“យើងនឹងវិនិច្ឆ័យរុស្ស៊ីតាមសកម្មភាព មិនមែនពាក្យសម្ដីទេ” លោកស្រី ប្រ៊ូស បានសរសេរនៅលើបណ្តាញ X។
“យើងបានសម្រេចកិច្ចព្រមព្រៀងជាមួយអ៊ុយក្រែនសម្រាប់រ៉ែធាតុសំខាន់ៗនិងថាមពលដើម្បីផ្តល់មូលនិធិដល់ការកសាងឡើងវិញរបស់ពួកគេ។ ឥឡូវនេះយើងត្រូវការសំណើជាក់ស្តែងពីភាគីទាំងសងខាងដើម្បីបញ្ចប់ជម្លោះ។”
នៅក្នុងសេចក្តីថ្លែងការណ៍ដែលត្រូវបានផ្សាយនៅលើ NewsNation លោកស្រី ប្រ៊ូស បានបង្ហាញថាការចូលរួមបន្ថែមរបស់សហរដ្ឋអាមេរិកក្នុងការចរចាសន្តិភាពគឺអាស្រ័យលើកិច្ចព្រមព្រៀងបញ្ឈប់បាញ់។
“យើងបាននិយាយដដែលៗថា ដើម្បីឱ្យយើងអាចបន្តទៅមុខទាក់ទងនឹងជម្លោះនេះ ត្រូវតែមានការបញ្ឈប់បាញ់” លោកស្រីបាននិយាយ។
ប្រធានាធិបតីរុស្ស៊ី វ្លាឌីមៀរ ពូទីន មិនបានយល់ព្រមចំពោះការបញ្ឈប់បាញ់រយៈពេល៣០ថ្ងៃដែលស្នើឡើងដោយអ៊ុយក្រែននិងអឺរ៉ុបទេ — ដែលជាសំណើក៏ត្រូវបានគាំទ្រដោយសហរដ្ឋអាមេរិកដែរ។ ជំនួសឱ្យការពន្យារការបញ្ឈប់បាញ់រយៈពេលបីថ្ងៃដែលគាត់បានប្រកាសដើម្បីគោរពពិធីអបអរទិវាជ័យជម្នះរបស់រុស្ស៊ី ពូទីន បាននិយាយនៅថ្ងៃទី១១ ខែឧសភាថា រុស្ស៊ីចង់ធ្វើការចរចាដោយផ្ទាល់ជាមួយអ៊ុយក្រែននៅទីក្រុងអ៊ីស្តង់ប៊ុលនៅសប្តាហ៍ក្រោយ។
ការបញ្ឈប់បាញ់ទូលំទូលាយអាចត្រូវបានចរចានៅអំឡុងពេលការពិភាក្សាទាំងនោះ ដែលនឹងចាប់ផ្តើមនៅថ្ងៃទី១៥ ខែឧសភា គាត់បាននិយាយ។
រុស្ស៊ីបានប្រកាសជាបន្តបន្ទាប់អំពីការរួចរាល់របស់ខ្លួនសម្រាប់ការចរចាសន្តិភាព ខណៈពេលជាមួយគ្នានោះក៏ជំរុញការទាមទារជាអតិបរមាដែររួមទាំងការប្រមូលយកទាំងស្រុងនូវតំបន់ដូនេសក៍ លូហ្គេនស៍ សាប៉ូរីសហ្ស៊ា និងខេសុនរបស់អ៊ុយក្រែន និងការទទួលស្គាល់ជាអន្តរជាតិនៃការកាន់កាប់ដោយខុសច្បាប់របស់ខ្លួននៅឧបទ្វីបគ្រីមៀ។
កាសែត The Wall Street Journal (WSJ) បានរាយការណ៍នៅថ្ងៃទី៩ ខែឧសភាថា ប្រធានាធិបតីសហរដ្ឋអាមេរិក ដូណាល់ ត្រាំ មានការខកចិត្តចំពោះភាពអសមត្ថភាពរបស់រដ្ឋបាលគាត់ក្នុងការសម្រេចកិច្ចព្រមព្រៀងសន្តិភាព និងឥរិយាបថច្រអូសរបស់រុស្ស៊ីក្នុងការចរចា។
យោងតាមសេចក្តីថ្លែងការណ៍រួមដែលចេញផ្សាយដោយអ៊ុយក្រែន ចក្រភពអង់គ្លេស បារាំង អាល្លឺម៉ង់ និងប៉ូឡូញនៅថ្ងៃទី១០ ខែឧសភា សហរដ្ឋអាមេរិកនឹងចូលរួមជាមួយសម្ព័ន្ធមិត្តរបស់ពួកគេក្នុងការដាក់ទណ្ឌកម្មបន្ថែមប្រឆាំងនឹងរុស្ស៊ី ប្រសិនបើគ្រឹមឡាំងបដិសេធសំណើបញ្ឈប់បាញ់ចុងក្រោយនេះ៕
ប្រភព៖ Kyiv independent
